Jab Zainabe ghareeb ke run mein

Jab Zainabe ghareeb ke run mein pisar lade

Tanha lade yeh aah woh sab ahle shar lade

Kis khoobsurthi se Ali ke jigar lade

Ek shor padgaya ke ghazab shere nar lade

Virsa unhein mila hae janabe Ameer ka

Yeh zor sab hae sher ke beti ke sheer ka

Zainab jo nangay paaoun khadi thi qareebe dar

Abbas jaakey dete thay yeh dambadam qabar

Roen na ab huzoor muhim ho chuki hae sar

Lakhon se lad rahe hain ghazab aapke pisar

Zor aaj phir dikhadiya qaibar kushai ka

Ab toh unhi ke haath hae maidaan ladai ka

Aansoo baha ke binte Ali ne kaha ke haan

Dey aur himmatein inhein qallaqe inso jaan

Bachhe kahan hazaaron ka woh mareka kahaan

Kuch ho inhe falak ne na honay diya jawaan

Bekas hoon aur is pah mujhe aitamad hae

Qaliq woh dey ke jo mere dil ki muraad hae

Bhaiyya kuch apne betoun ka mujhko nahin khayaal

Marjaye ladke ya ke ho taapoun se paayemaal

Sadqe karoon hazaar jo aise ho naunehal

Sab dowlatein lute pah bache Fatema ka laal

Aaye bahan pah woh jo bala un pah aai ho

Duniya mein koi ho ke na ho mera bhai ho

Yeh zikr tha ke bhai ko hazrat ne di sada

Abbas aao ghir gaye Zainab ke dilruba

Dowde sada yeh sunte hi Abbas-e bawafa

Asnae raah mein Ali Akbar ne yeh kaha

Zinda rakha falak ne yeh aansoo bahane ko

Chaliye huzoor jaate hain laashe uthane ko

Chillae rokay hazrat-e-Abbase naamwar

Chota tamaam hogaya ya Shaahe bahrobar

Hazrat pukare haath kaleje peh maar kar

Hae hae bada bhi margaya veeran hua yeh ghar

Maa muntazar hae chaak garebaan kiye hue

Kis moonh se jaoon qaime mein laashe liye hue

Kuch kuch abhi tha dum ke unhein le chale imam

Ek laash ko toh aap liye thay shahe anaam

Aur ek laash hazrate Abbas-e-nekh naam

Qaima tha saamne ke biza-at hui tamaam

Jeete na pahunche haaye ghazab qaima gah mein

Dono sagheer mar gaye asnaye raah mein

Zainab ke dil ko hogayi waanh qud ba qud qabar

Jaa baithi aap maatami saf par jhuka ke sar

Laye Hussain dono ke laashe lahu mein tar

Farmaya haaye lut gaya bekas behan ka ghar

Doh qanjar ek baar kaleja pah chal gaye

Aaye thay tum se milne ko par dum nikal gaye