Kisi ka khaana-e-ummid bey

Kisi ka khaana-e-ummid bey charaag na ho

Jawaan betay ka dilko pidar kay daag na ho

Hazaar baagh lutain par khizaan yeh baagh na ho

Pisar kay gham sey pareshaan dil-o-dimaagh na ho

Falak balaa ka Shahey Karbala pa toota hai

Musaaferi main baraabar ka laal choota hai

Woh laal jisko na pahoonchey koyi durr-e-shehvaar

Waheed-e-asr shabaahath main Ahmad-e-Mukhtaar

Hameisha misl-e-Ali rozadaar shab beydaar

Shujaa-o-muttaqi-o-khush mizaaj gheerathdaar

Yeh sab kamaal miley zeir-e-khaak ek din main

Tamaam hogaye attaara saal kay sin main

Batool kehthi thi faryaad ya Ali faryaad

Meri bahoo huvi barbaad ya Ali faryaad

Bajaaye rahem hai beydaad ya Ali faryaad

Khuda kay waasthay doh daad ya Ali faryaad

Duhaayi Yousuf-e-aal-e-abaa ko maara hai

Jawaan ko maara hai naakith Khuda ko maara hai

Likhaa hai waa abathaa ki joonhi sadaa aayi

Hussain Imam kay chehrey pay murdhani chaayi

Woh aah ki kay Zari-e-Rasool tharraayi

Ravaana hogayi ashkoun kay saath beenaayi

Sawaar-e-doush-e-Payambar ki aas toot gayi

Inaan-e-sabr toh thaami lagaam choot gayi

Pukaarthay hain pisar ko pisar nahin aatha

Jigar main dard hai Laqthay jigar nahin aatha

Koyi rafeeq-e-Shahey behrobarr nahin aatha

Tumhaarey bhaayi ko rasthaa nazar nahin aatha

Pisar kay gham main khoozaada mera halaak huva

Basaa basaaya ghar unsatt baras ka khaak huvaa

Yahaan toh Fizza yeh karthi thi dard ki taqreer

Asaa-e-aah utthaa kar udhar chaley Shabbir

Andheira saamney aankhoun kay aur dil tagheer

Har ek baar yeh naara kay ya janab-e-Ameer

Kabhi utthey kabhi Sultaan-e-Mashraqain girey

Likhaa hai yeh kay bahaathar jagaah Hussain girey

Qadam qadam pa ttaheirthay thay Shaahey tashnaa guloo

Hawaa main soongthay thay apney laal ki khushboo

Zameen pa bait kay gaahey bahaathay thay aansoo

Talaash karthay thay haathoun sey laash ko harsoo

Jo koyi poochtha tha kya Huzoor dhoondthay hain

Toh rokay kehtay thay ankhoun ka noor dhoondtey hain

Qareeb-e-fouj jo Sultaan-e-behrobarr aaye

Pukaarey hanskay adoo khair hai kidhar aaye

Yeh koun margayaa jo aap nangay sar aaye

Piyaadah dhoop main thaamey huvey jigar aaye

Yeh koun chaand huvaa aaj door aankhoun sey

Kay chaen dil sey gaya aur noor aankhoun sey

Kaha Hussain ney rokar tumhey nahin maaloom

Hamaarey ghar main hai mehshar tumhey nahin maaloom

Mitee Shabihey Payambar tumhey nahin maaloom

Chutaa Hussain sey Akbar tumhey nahin maaloom

Rulaaney ko yeh Imam-e-Umam sey poochtay ho

Churee phiraakay kaleijay pa humsey poochtay ho

Aye aankhein waalo mera noor-e-ain kisjaa hai

Jawaano bolo meray dil ka chaen kisjaa hai

Jawaan-e-faatahey badr-o-hunain kisjaa hai

Zaeefo ainak-e-chashm-e-Hussain kisjaa hai

Kaho Rasool ki tasveer ko kahaan khoyaa

Asaa-e-peeri-e-Shabbir ko kahaan khoyaa

Pukaara shimr kay koyi nahin bathaaney ka

Badaa sawaab hai saadaath kay rulaaney ka

Na zinda chodeingay bachcha bhi is gharaaney ka

Iraadaa hai Ali Asghar kay khoon bahaaney ka

Jo teer paar ho nanhey galay sey eid karein

Tumhaari godh mai shashmaahey ko shaheed karein